Tips para makatipid sa pagpapadentista

Psst…gusto mo bang magpapasta sa halagang PHP 50 lang?

No, hindi chicklet ang ipangpapasta sa iyo pag ganito lang kamura ang ibabayad mo. Kung ano ang pinangpapasta na “silver” sa mga dental clinic ay yun din ang gagamitin sa iyo. Magpalinis ng ipin ba kamo? Basta’t may trenta pesos ka (PHP 30), pwedeng pwede na!

Hindi joke o prank sa Wow Mali ito. Maaring ganito lang ang ibayad mo sa mga dental schools para gamutin ka ng mga estudyante nila na nag-aaral ng dentistry. Teka, bago ka mapangiwi e sisiguraduhin ko naman na merong lisensyado at well-trained na dentista na titingin sa mga estudyanteng gagawa sa mga pasyente. Ito ay para masigurado na tama gagawin nila at hindi mapapahamak ang pasyente nila.

Ano ba ang dapat gawin para makapagpadentista ng mura sa mga dental school?

1. Magpunta sa dental school na malapit sa inyo. Importante na malapit o convenient sa inyo ang pagpunta sa mapipiling dental school. Mamaya ko ipaliliwanag kung bakit. Mas mainam kung maaga magpunta para mas malaki ang tsansa na ma-accomodate at hindi maghintay ng matagal.

2. Hanapin kung saan ang section kung saan ang klinika ng dental school. Maaring magtanong sa guard at sabihin na “walk-in patient” kayo.

3. Magpatala bilang pasyente. Kanya-kanya ng proseso ang mga eskuwelahan kung paano sila tumatanggap ng walk-in patients.

Halimbawa, sa Our Lady of Fatima University sa Valenzuela, mayroong estudyante na naatasan para tumanggap at magrefer ng mga pasyente sa ibang estudyante. Tinatawag nila itong “Officer In Duty” o OD. Kapag may pasyenteng dumating, ang OD ang bahala na mag-assign sa kanya sa isang clinician (dental student na gumagamot na ng pasyente sa klinika ng paaralan).

Kung lahat ng clinician ay may mga pasyente na para sa araw na iyon, maari kayong magpatala sa kanilang logbook. Ilalagay mo doon ang iyong pangalan, address at telepono kung saan pwede kang ma-contact ng clinician na maaring gumawa sa iyo.

4. Kapag may available na clinician, may mga forms na kailangan mong sagutan. Kadalasan, hinihingi ang iyong contact details, mga gamot na iniinom, allergies, karamdaman (kung meron man), huling pagpunta sa dentista, etc. Dapat ay maging tapat sa pagsagot sa mga tanong na ito dahil lahat ng iyon ay importante sa iyong gamutan.

5. Kapag natapos na ang form ay sisimulan na ang oral examination. Huwag mag-alala, hindi ka patatayuin para i-recite ang Panatang Makabayan o ang buong multiplication table. Ang ibig sabihin ng oral examination ay titingnan ng clinician ang loob ng iyong bibig para maitala ang mga ngipin na OK pa, may sira at mga ngipin na natanggal na sa iyong dental chart. Pagkatapos ay isang mas mabilis na oral examination uli pero Professor o Clinical Instructor (CI) na titingin sa iyo. Ito ay para masigurado na tama ang mga pinagsusulat ng clinician mo sa dental chart.

6. Pag tama naman ang nakita ng CI, magrerekumenda na sa iyo ang clinician ng mga dapat gawin sa ngipin mo –kung linis, pasta, bunot o pustiso.

7. Pag OK na lahat ay maari nang simulan ang gamutan ayon sa pagkakasunod-sunod sa iyong dental chart. Pero wag, masyadong ma-excite. Hindi lahat ng kailangang gawin sa iyo ay magagawa sa araw ding iyon. At dahil sa eskuwelahan gagawin ang gamutan, mas matagal ang proseso kesa sa paggawa sa isang pampribadong klinika dahil kailangang i-check pa ang natapos na gamutan ng CI.

Ang pagpapagamot sa mga dental school ay nangangailangan ng pasesnya at madaming bakateng oras sa parte ng pasyente. Gaya ng sabi ko, mas mahaba ang proseso ng gamutan at maari kang pabalikin ng ilang beses, depende sa prosesong ginawa sa iyo. Halimbawa, ang linis ng ngipin sa isang pampribadong dental clinic ay nagtatagal lamang ng 30 minutos. Sa dental school, siguro mga 1 hanggang 2 oras, kasama na ang pagfill-up ng mga forms, oral exam at ang aktuwal na paglilinis ng ngipin. Kailangang ka ring bumalik kung sakaling sobrang dami ng tartar na kailangang tanggalin o sobrang maga ng iyong gilagid.

Kaya nga importante malapit at madali sa iyo ang pagpunta sa dental school kung saan mo gustong magpagamot para mas madali sa iyo na bumalik kung kinakailangan.

Pero mahaba man ang proseso ng gamutan ay sobrang mura naman ang presyo ng mga serbisyo sa dental school. Ang linis sa pampribadong dental clinic ay nasa PHP 400 pataas, pero sa dental school ay PHP 30 o minsan ay libre pa! Higit sa lahat, sigurado ka na pulido ang pagkakagawa sa iyo ng clinician, kung hindi ay siguradong lagpak siya!

Ang mga listahan ang mga ilang dental school sa Maynila na tumatanggap ng pasyente ay ang mga sumusunod:

1. CEU School of Dentistry – Dent-Sci Bldg. Mendiola St. Manila (Tel. No. 735-6861 to 71 loc. 214)

Maaring sumakay ng LRT 3 at bumaba sa Legarda Station. Madami ring jeep at bus (biyaheng Cainta-Quiapo tulad ng               RRCG at G-Liner) na dumadaan dito.

2. UE College of Dentistry – Gastambide St. Manila (Tel. No. 735-85-38)

Pwede ring sumakay ng LRT 3 at bumaba sa Legarda Station. Pwede nang lakarin mula dito ang UE College of Dentistry sa Gastambide St. Gaya ng CEU, madami ding jeep at bus na dumadaan dito.

3. Our Lady of Fatima University – McArthur Highway, Valenzuela (Tel. No. 293-27-03 to 06

Pwedeng mag LRT 1 at bumaba sa Monumento Station. Sumakay ng jeep pa-Valenzuela at magpababa sa “Fatima University”

4. MCU – PGT Bldg. MCU EDSA Caloocan (Tel. No. 364-1071 Local 156)

Pwedeng sumakay ng LRT 1 at bumaba sa Monumento Station. Maaring lakarin na ang MCU o sumakay ng jeep pa-Cubao pero maging alisto at baka lumpas ka kasi ilang tumbling lang ay nasa MCU ka na.

5. UP Dentistry – Pedro Gil corner Taft Ave. Manila (Tel. No. 302-3983)

Maaring mag LRT 1 at bumaba sa Pedro Gil Station. Makikita na ang kolehiyo mula sa istasyon ng LRT. Kahilera ito ng PGH. Maari ring sumakay ng jeep, bus o FX na biyaheng Taft Ave. o PGH.

May mga ospital din na tumatanggap ng mga pasyente para sa libre o mas murang gamutan. Ang ilan dito ay:

1. PGH Department of Hospital Dentistry – PGH OPD Rm. 230 (Tel. No. 5548400 Local 5220/5230)

Ang PGH Dept. of Hospital Dentistry ay tumatanggap ng mga pasyente para sa bunot, at mga kaso na nangangailangan ng dental surgery tulad ng pagtanggal in impacted na wisdom tooth. Ang pagpunta dito ay katulad lang ng sa UP Dentistry.

2. Ospital ng Maynila – Quirino Ave. Manila (Tel. No. 524 6063)

May nakapagsabi na libre daw ang magpabunot o magpatanggal ng wisdom tooth dito pero kailangan mong magbigay ng “donation.” Kung mgakano man ang donation ay hindi ko alam pero malamang ay hindi naman kasing taas ng pagpapatanggal ng wisdom tooth sa pribadong klinika.

Maaring sumakay ng LRT 1 at bumaba sa Quirino Station tapos ay lumakad o sumakay ng pedicab pa-Roxas Blvd. Pwede ring sumakay ng jeep biyaheng Harrison Plaza via Mabini. Malapit lang ito sa Manila Zoo.

Para sa mga gusto naman makamura sa pagpapa-braces, maaring pumunta sa:

UP College of Dentistry Graduate School (Orthodontics) – Padre Faura, Manila (Tel. No. 526-2296 TO 97)

Halos katapat lang ito ng Robinson’s Place Manila Faura Wing. Maaring sumakay ng jeep, FX o bus na byaheng Taft, PGH. Bumaba sa Padre Faura at maaring lakarin na ito. O mula Taft ay sumakay uli ng jeep byaheng Sta Ana/ Pedro Gil. Bumaba pagkatapos ng DOJ. Katabi nito ang Graduate School for Orthodontics.

Ang mga gagawa sa iyo ay mga lisensyadong dentista na nagsasanay para maging espesiyalista sa orthodontics. May bayad ang pagpapagamot dito pero di hamak na mas mura kesa magpabraces sa pribadong dental clinic.